Lizaso Salsamendi, Ebaristo
Aginagan jaioa, 1909/09/23an. Tellegindegi baserriko semea. Josefa Jaurrietarekin ezkondua zegoen eta bi haur zituzten. Errekalden bizi ziren eta Michelin enpresako langilea zen.
Gerra lehertu zenean, kolpistek mobilizatu egin zuten nahiz eta aurretik izan zuen istripu baten ondorioz, frontean borrokatzeko gauza izan ez. Horregatik, sukalde lanetan jarri zuten hasieran. Gerora, ordea, ebakuntza bat egin eta frontera bidali zuten. Burgoseko 11. Artilleria arineko erregimenduan zegoela, 28 urterekin, Bruneten (Madrid) hil zen 1937/07/06an.
Berarekin soldadu zegoen azpeitiar batek eman zion gertakizunen berri bere familiari. Nonbait, ebakuntzatik oraindik erabat osatu gabe, bi mendien artean errepublikazaleen hegazkinen bonbardaketa batek erdi-erdian harrapatu eta ihes egiteko gauza ez zela, bera han geratu eta bertan hil omen zen. Gorpua azaldu ez zenez, desagertutzat eman zuten. Bere emazteak pentsio bat jaso zuen eta bi umeentzat egunero ogi bana izan zuten adinez nagusi izan ziren arte (garai hartan 22 urte egin arte).
Bere anaia Roxendo ere kolpistek mobilizatu egin zuten eta bala batek arinki zauritu zuen. Anaia gazteena -Joxe Mari-, berriz, 18 urterekin mobilizatu zuten Afrikara. Juxtu soldadu joateko trena hartzera zihoanean izan zuen Ebaristoren heriotzaren berri.
Iturria:
Usurbilgo Erregistro Zibila. Jaiotza 1 atala- 2 liburua-58 orria. Heriotza. 3. atala – 6 liburua -44 orria- 11/1945.
AHDSS-DEAH San Salvador, Usurbil T.6 f.44.
BOE, 12/5/1943
Argazkia: ‘Usurbilgo baserriak eta baserritarrak’ 178. orria (Josu Tellabide)
Maria Dolores Salsamendi Lizaso senidearen testigantza
